Dagens leder

* Det raudgrøne samarbeidet blir sett på prøve no under landsmøtesesongen til partia. Siste året har vanskelege konfliktsaker ført med seg dårlege meiningsmålingar og utløyst spådommar om at det snart er solnedgang for samarbeidet. Så lenge det raudgrøne samarbeidet har eksistert, har einskilde i Senterpartiet drømt om at sentrumssamarbeidet skal stå opp att. I SV er det krefter som vil vera reine og ranke, heller enn å skitne seg til med kompromiss. Men desse kreftene har ikkje styrkt seg vesentleg, trass i problemsakene siste året. Tvert om vart forliket om Lofoten og olje eit positivt vendepunkt for det raudgrøne samarbeidet. Her klarte Jens Stoltenberg å sameine dei motstridande interessene til næringspolitikarane i Ap og miljøpolitikarane i SV.