Væpna med høgt hår og eyeliner jaktar Michael Monroe stadig på den perfekte plata.

Det var i Helsinki 1967 at femåringen Matti Antero Kristian Fagerholm starta med pianotimar. Som 8-åring vart han introdusert til rock via tv, der han såg Black Sabbath med «den gale songaren med det lange håret». Slik ville også Matti bli. Det måtte gå an å spele Black Sabbath på piano, tenkte han. Seinare vart han introdusert til blues og reggae og Little Richard gjorde at han blei forelska i saksofonspel. Han lærte også å spele gitar. Med dette på plass, væpna med høgt hår, eyeliner og rock and roll, starta karrieren til mannen vi i dag kjenner som Michael Monroe, medgrunnleggar og frontmann i bandet Hanoi Rocks.