Fredag 4. januar 2019
DEBATT: Statsminister Erna Solberg, finansminister Siv Jensen, kulturminister Trine Skei Grande og nestleiar i KrF Kjell Ingolf Ropstad starta onsdag regjeringsforhandlingar på Granavolden Gjæstgiveri på Hadeland. Moglege endringar i abortlova er blant sakene som har fått mykje merksemd. FOTO: CORNELIUS POPPE, NTB SCANPIX
Politikarar frå Frp og Høgre vil ikkje la seg tvinge med på å forby tvillingabort:
Krev å få røyste ned KrF
Åshild Bruun-Gundersen (Frp)
NEKT: Frps Åshild Bruun-Gundersen avviser at abortlova kan bli endra i regjeringsforhandlingane. Same kva Siv Jensen og dei andre kjem fram til, vil ho stå fritt til å røyste mot i Stortinget.

abort

KrF går inn i regjeringsforhandlingane på Granavolden Gjæstgiveri på Hadeland med endring av abortlova som sitt viktigaste krav. Frå før har Venstre og Frp satt ned foten for å endre paragraf 2c i abortlova. I går sa KrFU-leiar Martine Tønnessen til NRK at KrF kan nøye seg med et forbod mot såkalla tvillingabort.

No skyt Frps helsepolitiske talskvinne Åshild Bruun-Gundersen ned også dette kravet. Til Klassekampen seier ho at ho ikkje vil stemme for innstrammingar i abortlova, heller ikkje tvillingabort, eller fosterreduksjon.

Ho forventar også at Frp sine stortingsrepresentantar blir fristilte i handsaminga av alle eventuelle endringar i abortlova, slik tradisjonen er i Frp. Også dersom forbod mot fosterreduksjon blir ein del av regjeringserklæringa som Høgre, Venstre, Frp og KrF sit og forhandlar om på Granavolden Gjæstgiveri på Hadeland.

– Frp fristiller alltid sine representantar i spørsmål knytt til abort og bioteknologi. Og eg har ikkje gitt nokon frikort til å forhandle vekk mi stemme, seier Bruun-Gundersen.

Fakta

Ny regjering:

• Høyre, Frp, Venstre og KrF har i regjerings­sonderingar lagt hovudretninga til den potensielle nye regjeringa.

• Tirsdag starta dei formelle forhandlingane om den nye regjeringserklæringa.

• Moglege endringar i abortlova er blant sakene som på førehand har fått mykje merksemd.

– KrF bør ikkje vere i tvil

KrF-nestleiar Kjell Ingolf Ropstad har omtalt regjeringsforhandlingane med dei borgarlege partia som ei «historisk moglegheit» til å endre abortlova. Bruun-Gundersen seier det ikkje bør vere nokon tvil hos KrF om at Frp sine representantar på Stortinget ikkje kan bindast spørsmål om abort, og at svært få ønskjer å gå med på innstrammingar.

– Gjennom heile debatten om KrF sitt retningsval har Frp vore tydelege på dette. Likevel valde KrF å gå til høgresida. Dei kan ikkje krevje av oss at vi skal gi opp retten til å stemme i tråd med samvitet vårt her, seier ho.

– Så kan dei gå til venstresida, men dei får ikkje noko meir der, legg ho til.

Bruun-Gundersen seier det er eit sjølvstendig poeng abortlova skal stå seg over tid og syns ikkje den høver seg som tema i regjeringsforhandlingar.

– Dersom Frp sin forhandlingsutval kjem attende frå Gran med eit framlegg til regjeringsplattform der KrF har fått eit forbod mot fosterreduksjon, vil du då krevje å likevel få stemme imot dette i Stortinget?

– Ja, seier ho.

Kan opne for nemnd

Bruun-Gundersen seier at sjølv om ho ikkje vil stemme for eit forbod mot fosterreduksjon, er ho open for at slike inngrep moglegvis bør handsamast i nemnd før dei blir innvilga. I dag gjev abortlova kvinner rett til sjølvbestemt fosterreduksjon av eitt eller fleire friske fostre før utgangen av 12. svangerskapsveke.

– Slik eg forstår det, kan det vere medisinske grunnar til at fosterreduksjon bør bli utført etter veke 12, seier Bruun-Gundersen.

– Så du kan opne for at fosterreduksjon bør inn under nemndene?

– Kanskje. Men eg forventar uansett at Frp sine representantar er fristilte i handsaminga av eventuelle endringar i abortlova. Og vår ståstad er at kvinner sjølve skal bestemme. Sist dette var diskutert Stortinget, var det berre ein frå Frp som opna for eit forbod mot fosterreduksjon.

Støtte frå Høgre

Bruun-Gundersen får stønad frå Høgre sin stortingsrepresentant Heidi Nordby Lunde i forventinga om fristilling. Heller ikkje ho ønskjer å forby fosterreduksjon.

– Høgre har tradisjon for å fristille i slike spørsmål, og det forventar eg å få vere dersom det blir spørsmål om endringar av dagens abortlov, seier Lunde til Klassekampen.

Ho legg til at Høgre sitt forhandlingsutval har fått fullmakt til å forhandle om alle spørsmål, men at ho forventar at utvalet tek omsyn til fakta når det kjem til fosterreduksjon.

– Det har vore fleire løgner i denne debatten, for å seie det rett ut. Til dømes påstanden om at vi har abortturisme til Noreg. Det er ingenting som tyder på at det stemmer, seier ho.

– Så du vil stemme imot eit forbod uansett utfall av regjeringsforhandlingane?

– Det har eg ikkje tatt stilling til. Men Høgre har eit vedtak på å halde på dagens praksis som er godt medisinsk fundert. Når vi snakkar om fosterreduksjon, snakkar vi om rundt fem inngrep i året, seier Lunde.

politikk@klassekampen.no

Torsdag 23. januar 2020
NYE TIDER: Flere Frp-topper vil lokke Sp over i et framtidig borgerlig regjeringssamarbeid. «Komisk», svarer Sp.
Onsdag 22. januar 2020
VIKEN: Med Frp tilbake i Stortinget kan det gå mot oppløsning av Viken før 2021.
Tirsdag 21. januar 2020
EXIT: Frp-nestor Carl I. Hagen maner sitt gamle parti til å drive nådeløs opposisjonspolitikk. Nå forventer han kamp om ledervervet.
Mandag 20. januar 2020
IGJEN: På Aps landsmøte i fjor vant partileder Jonas Gahr Støre slaget mot dem som vil utvide grensa for selvbestemt abort. Men krigen er ikke vunnet.
Torsdag 16. januar 2020
URO: Frp vil kun være fornøyd med politiske gjenytelser som kommer i tillegg til regjeringsplattformen, etter at en norsk IS-kvinne ble hentet fra Syria, sier Jon Helgheim (Frp).
Torsdag 2. januar 2020
SKEPTISKE: Både KrF og Frp frykter at Rusreform­utvalgets anbefalinger til ny rus­politikk vil føre til mer narkobruk blant unge.
Mandag 23. desember 2019
HAR TROA: SV-leder Audun Lysbakken tror han får med seg Senterpartiet på et rettferdig, grønt skifte.
Torsdag 19. desember 2019
BLÅSER: Som eldre- og folke­helseminister gikk Sylvi Listhaug ut mot regjeringens vindkraftpolitikk. Nå får hun ansvaret for den.
Tirsdag 17. desember 2019
LET­TER PÅ SLØ­RET: Sist uke ville ikke For­svars­de­par­te­ment røpe hvor al­vor­lig kri­tik­ken fra Riks­re­vi­sjo­nen er. Nå har for­svars­mi­nis­te­ren snudd.
Mandag 16. desember 2019
VRI: La fagfolk styre velferds­tjenestene, dropp overdreven rapportering og ta tjenester tilbake til offentlig drift. Det er Mette Nords oppskrift for en anti-NPM-reform.