Det er ein av desse bitande kalde vinterdagane med blå himmel og kald vind, der kulda sender straumprisane oppover på den nordiske straumbørsen Nordpool. Langs ein mur framfor Stortinget står 29 faner med broderte motiv og stadnamn frå heile landet oppstilte. Her er Kverneland Jern og Metall og Fiskaa Verk Arbeiderforening sine antikvariske faner frå 1920-talet. Her er faner frå Odda og Årdal, Stavanger og Oslo. Faner for folk i både industrien og offentleg sektor står langs muren. «Samhald gir styrke», står det på ei av dei.