Klassekampen.no
Fredag 11. august 2017
Frp

Igjen og igjen blir det sagt at dette valet kviler på om Venstre kjem over eller under sperregrensa (og til ein viss grad: om SV gjer det same). Skilnaden på eitt eller to og sju eller åtte stortingsmandat er så stor at det vil vippe heile fleirtalet. Og det er jo sant, sjølvsagt. Men er det ikkje noko meir her? Jo: Det kraftige fallet Frp har vore gjennom, og som gjer at heile det borgarlege fleirtalet no kviler på eit mildt sagt ustabilt Venstre.

I 2013 vann høgresida valet. Faktisk vann dei så klart at det hadde halde om eitt av dei to sentrumspartia ville vere med på å gje Frp og Høgre regjeringsmakt. Frp fekk 460.919 røyster, 16,3 prosent og 29 stortingsplassar. Det er rett nok dårlegare enn vala i 2009 og 2005, men å få nesten ein halv million røyster er jo ikkje så verst. Hittil i august ligg Frp på 12,9 prosent på målingane, noko som svarar til fem stortingsrepresentantar – om lag det same som høgresida kan miste om Venstre går under.

På dei dårlegaste målingane er Frp heilt nede ved titalet, som gjev om lag 20 representantar. Om Frp skulle få eit resultat i takt med snittet av målingane vil dei miste fleire stortingsrepresentantar enn kva SV gjorde etter sin fyrste regjeringsperiode. I så fall vil ikkje Frp berre ha gått i SV-fella, dei vil ha sett ein ny standard for fellemakeri.

Lokalvalet for to år sidan var ein katastrofe for Frp: 9,5 prosent av røystene i kommunevalet sytte for at Frp var nede som eit parti med éinsifra oppslutning. Partiet kan i dette valet ende opp med å bli det fjerde største på Stortinget dersom Sp passerer dei. Det er ikkje veldig sannsynleg, men det kan faktisk skje. På målingane ser det ut til at Frp har mista over hundre tusen veljarar. Det er forferdeleg mykje folk, og som nemnt: Langt fleire enn den gjengen som slutta å røyste SV mellom 2005 og 2009, eller mellom 2009 og 2013. Høgre kan gjere eit val som er nesten like godt som i 2013. Det er imponerande. Men Frp-fella er faktisk ei felle som kan felle regjeringa.

Artikkelen er oppdatert: 15. august 2017 kl. 14.41

Klassekampen benytter informasjons­kapsler (cookies) så vi kan gi deg bedre service, og for å holde styr på om du er logget inn på våre tjenester. Du kan lese mer om vår bruk av informasjons­kapsler her.

Lukk