I nokre av åra eg budde i Vest-Afrika, hende det seg slik at eg fekk omsorga for ein bitte liten morlaus antilopekalv. Mora omkom i ei bilulykke, og ungen låg att, tindrande i live. Han vart med heim, vart dulla og stelt med og fekk namnet Majakovskij. Vladimir Majakovskij var, som mange vil vita, ein russisk poet som i likskap med tallause andre unge kunstnarar, omfavna revolusjonen i 1917. I åra før og etter revolusjonen blomstra kunsten eventyrleg. Målarar som Kandinskij, Malevitsj, Chagall, grunnleggjaren av den russiske balletten Djaghilev, teaterfolk som Meyerhold, musikarar som Sjostakovitsj og Stravinskij, filmskaparar som Eisenstein.