Sviket
- Olav Randens kommentar på denne sida, der han tek for seg Islands nære historie og «torskekrigens» politiske betydning, står forvitneleg saman med to av laurdagsavisenes viktige artiklar. Europa-politikaren og korrupsjonsjegeren Eva Joly rettar på kronikkplass i Aftenposten knusande kritikk mot Det internasjonale pengefondet (IMF), EU og også dei nordiske landa, på grunn av utpressinga av Island i samband med den såkalla Icesave-skandalen. Her i avisa går Dag Seierstad gjennom Icesave-saka på vanleg, pedagogisk vis. Han peikar på den politiske dramatikken når Alltinget, forbitra og under tvang, vil måtte godkjenne avtalen som kan bidra til å ruinere det stolte øyfolket.
- Saka gjeld oppvasken etter at nettbanken Icesave fram til 2008 lokka til seg fleire innskytarar i Storbritannia og Nederland enn det er innbyggjarar på Island - 400.000 mot 320.000. Lokkematen var urealistisk høge renter. Banken kollapsa, og innskott på rundt 55 milliardar norske kroner gjekk tapt. Island er med EUs og IMFs «hjelp» tvinga inn i ein avtale om at staten skal dekkje over halvparten av pengane som bankkundane tapte. Sia staten er bankerott, må Island låne dei mange milliardane av Storbritannia og Nederland, til rente på 5,5 prosent - ei ågerrente i desse tider. Gordon Brown fann i fjor grunn til å true med anti-terror-lover for å trakke Island under fot. Det blir ikkje gløymt med det første.
- Eva Joly skriv at Europa og IMF «er i ferd med å gjennomføre litt av en prestasjon: å skyve et land der indeksen for menneskelig utvikling på noen tiår var nådd opp blant de beste i hele verden, ned til et nivå for fattige land». Ho meiner EU og IMF ikkje har tatt lærdom av samanbrotet som følgde den overdrivne reguleringa av finansmarknadene, og at dei nordiske landa «som gjerne er fanebærere for internasjonal solidaritet, glimrer med sitt fravær når det gjelder reaksjonar på den utpressingen som Island utsettes for». Nokre titals vanvittige finansspekulantar og ei fiendtleg omverd kan tvinge Island i retning av å bli ein fråflyttingsherja og råvareproduserande koloni for det rike Europa.
