*Biltrafikken må ned dersom reduksjon av norske klimautslepp skal bli meir enn laust prat. Dette er blant dei store utsleppskjeldene, som det store fleirtalet i samfunnet direkte eller indirekte gir sine bidrag til. Det er difor på sin plass å førebu tiltak som kan bli upopulære. Snart er det berre Framstegspartiet som forsøker innbille oss at ein kan møte klimautfordringane utan å gjera noko som kan gripe inn i livsstilen og forbruksmønsteret for «folk flest». Fagfolk i Vegdirektoratet meiner at drastisk høgare bensinprisar må til for å bryte utviklinga med stadig større biltrafikk.

*Men også debatten om tiltak for reduksjon i nasjonale klimautslepp må førast med blikk for sosiale, distriktspolitiske og klassemessige konsekvensar. Dette var mangelvare då Steinar Lem i Framtiden i våre hender før helga diskuterte klima og bensinprisar med SVs Heikki Holmås i NRKs Politisk Kvarter. Lem sa sorglaust at riktig bensinpris kan vera 18, 20 eller 25 kroner literen, berre det får ned bilbruken. Folk i distrikta har ifølge Lem så rimelege bustadutgifter at dei toler så høge bensinprisar, og dessutan kan dei kjøre mindre bil. Holmås og SV blir stempla som feige og ynkelege fordi dei ikkje ser dette som ein god strategi for å redusere bilbruken.

*Lem spelar rolla som provokatør som så ofte før, og det kan trengst. Men for miljørørsla kan det heller ikkje skade å fremme ein klimapolitikk som blir tatt på alvor og kan få oppslutning, også i distrikta. Lem har her i avisa sagt at bygdefolk og bønder på mange vis står nærast verdigrunnlaget for Framtiden i våre hender, og at ein ikkje treng skamme seg over å køyre bil når det ikkje er ordningar som gjer det overflødig. Inga jernbanesatsing kan erstatte bilen i store delar av Bygde-Norge. Med ei dobling av bensinprisen vil sentraliseringa skyte kraftig fart, med dei miljømessige følgjene dette har. Grensehandelen vil eksplodere, og dei sosiale utslaga blir openberre. Vi har større tru på vegprising rundt storbyane etter mønster frå Stockholm, slik det no er politisk fleirtal for å forsøke på Jæren. Dyrare bensin bør eventuelt kombinerast med utjamningstiltak for distrikta.