Båe delar går det an å livnæra seg av. Jonas Alsaker Vikan frå Trondheim er ein av dei som har gjort det.

Alsaker Vikan la i fjor opp som profesjonell spelar av Counter-Strike. I bortimot fem år har 25 åringen levd av å spela verdas mest populære online PC-spel. Counter-Strike er eit lagspel der to lag spelar mot kvarandre. Eit angrepslag og eit forsvarslag.

Den tidlegare proffspelaren nølar ikkje med å kalla den virtuelle valdsutøvinga for ein sport.

Krev disiplin

– E-sport er ikkje idrett, i den forstand at det er noko som fordrar fysisk aktivitet av mange på eit høgt nivå, men eg kallar det sport fordi spela følgjer reglar og krev trening, disiplin og ein gjennomtenkt konkurransestrategi som ikkje står tilbake for krava innan toppidrett.

Framveksten av E-sport og eit internasjonalt online-spelmiljø har kome som eit resultat av – og har utvikla seg parallelt med – den eksplosive veksten av internett. Counter-Strike er eit av dei eldste spela i sjangeren og ei av e-sportsgreinene der det per i dag finst hundrevis av lag og enno fleire einskildutøvarar som lever av å spela, finansierte av sponsorar. I tillegg finst sjølvsagt titals millionar av vanlege spelarar.

– Noko av det fascinerande med eit spel som Counter-Strike, er at det er like artig for alle same kva nivå ein spelar på. Spelet er så enkelt at det er låg terskel for å byrja, samstundes som det er komplekst nok til utvikla seg som spelar.

For dei dediserte blir det arrangert turneringar i alle verdsdelar. Asia er den verdsdelen der e-sport har størst interesse. Ikkje minst i Sør-Korea, men også i land som USA og Tyskland er det mogleg å følgja turneringar i onlinespel på fjernsyn.

Alternativ til fotball

Jonas Alsaker Vikan fekk interesse for onlinespel då han i slutten av tenåra fekk kyssesykje og måtte legga vekk fotballen.

Counter-Strike er heller ikkje heilt ulikt.

– Eg har alltid likt å konkurrera, og for den som vil bli god, følgjer det automatisk i denne som annan lagsport at ein blir involvert i eit sosialt fellesskap. For meg tok Counter-Strike over for fotballen, også på det planet.

– Kvifor er dei mest populære dataspela så valdelege?

– Det finst mange ulike dataspel – bilspel, ulike idrettsspel og jamvel luftgitarspel. Men det som fungerar best i den virtuelle verda, er som regel det som skil seg frå røynda. Det er meir underhaldande å spela Counter-Strike enn onlinefotball. Då snakkar eg ikkje om valds- eller våpenbruk. Det er ikkje interessa åt Counter Strike-spelarar. Det er derimot ferdigheiter, taktikk og metodar for å koma seg forbi ein motstandar til dømes. Om ein er interessert i fotball, gjev det meir å sjå kampar i Champions League, hevdar Jonas Alsaker Vikan.

I dag arrangerer Kosmorama ein oppvisningskamp i Counter-Strike på kinolerret i Trondheim, og Jonas Alsaker Vikan er hyra inn som kommentator. Måndag skal han fortelja eit vakse festivalpublikum om unge kommunikasjonstrendar.