LOs representantskap vedtok i går samrøystes å krevje at regjeringa gjer ein grundig konsekvensanalyse av verknadene tenestedirektivet vil få i Norge, og at det må bli ei ny høyring før regjeringa tek sitt standpunkt.

– Vi er veldig glade for LOs vedtak, som er heilt i tråd med SVs syn på korleis regjeringa bør følge opp saka. No kan vi få ein reell politisk debatt om direktivet, med eit ope utfall. Vårt syn får ei heilt anna tyngd med LO i ryggen. Eg tek for gitt at også Arbeidarpartiet må rette seg etter rådet frå ei samla fagrørsle, seier SVs nestleiar Audun Lysbakken.

– Meir enn ein halv siger. No må næringsminister Dag Terje Andersen høyre etter og rette opp departementets skandaløse handsaming av saka i høyringsrunden, seier Nei til EUs leiar Heming Olaussen.

– Eit utmerka vedtak. Situasjonen er fullstendig forandra sia LO-leiinga ville godta direktivet i november, seier Transportarbeidarforbundets leiar Per Østvold.

Fanemarkering

Representantskapets medlemer vart møtt med fanemarkering då dei kom til møtet i Folkets Hus. LO-organiserte frå Rogaland og Trøndelag hadde reist lengst for å ta del i markeringa på Youngstorget, som EL & IT Forbundet hadde tatt initiativet til. I alt 22 fagforeiningsfaner var på plass.

– Vi fryktar at tenestedirektivet vil ramme både forbrukarar og arbeidstakarar, ved at det ikkje vil bli høve til å oppretthalda godkjenningskrav til dei som skal utføra til dømes elektrikararbeid, seier Øivind Wallentinsen, leiar i Rogaland elektromontørforening. I dag blir kvar einaste fagarbeidar godkjend av Direktoratet for samfunnssikkerhet og beredskap.

– Skal prinsippet om at tenester som er godkjende i eitt land, skal godkjennast i alle EU- og EØS-land, gjelde, kan våre godkjenningsordningar stå i fare. Somme land har kvalitetskrav som er dårlegare enn våre, seier Wallentinsen til Klassekampen.

Dette er ei av mange innvendingar som gjer at eit samla LO sender direktivet tilbake til regjeringa, saman med krav om forsterka innsats mot sosial dumping.

– Tiltak viktigast

Vedtaket er eit kompromiss etter stor usemje mellom LO-forbunda. Somme ville krevje at regjeringa nyttar reservasjonsretten mot innføring av direktivet, medan Fellesforbundet og andre var innstilt på å godta direktivet på visse vilkår.

– Eg ville personleg ikkje hatt problem med ei meir positiv haldning til direktivet, men vi stiller oss fullt og heilt bak det som sekretariatet og representantskapet har komme fram til. Uansett er dei konkrete tiltaka mot sosial dumping som blir gjort her og no, viktigare enn kva vi meiner om tenestedirektivet, seier Fellesforbundets leiar Kjell Bjørndalen til Klassekampen.

LO vil særleg ha vurdert verknadene av tenestedirektivet når det gjeld arbeidsrettslege spørsmål og tiltak mot sosial dumping, og vilkåra for å løyse samfunnsmessige oppgåver gjennom offentleg sektor. LO føreset at direktivet blir send på «ny og endeleg høyring» når ein konsekvensanalyse ligg på bordet.

LOs standpunkt vil vera til god hjelp for SVs og Senterpartiets arbeid for å hindre at Ap trumfar gjennom eit ja til tenestedirektivet i regjeringa. Men spørsmålet er om dei mange krava til vidare utgreiing vil bety noko meir enn ei utsetjing.

Auka skepsis

– Det vil avhenge av korleis ein ny runde blir brukt. Dei siste månadene har skepsisen til direktivet auka monaleg i fagrørsla, fordi mange av problema står klårare etter ei grundig handsaming og imponerande innsats frå mange. Stemninga er snudd, og no gjeld det å ta vare på sjansen dette gir, seier Per Østvold.

– Regjeringa må lytte til alle dei bekymra reaksjonane mot direktivet som kjem frå mange hald. Ho må ta den tida som trengst, og skaffe legitimitet ved å trekke inn uavhengig kompetanse i vidare vurderingar. Næringsdepartementet er langt på veg diskreditert etter organiseringa av høyringsrunden, og har no fått klår beskjed om at dette ikkje held, seier Heming Olaussen.