Norad har brukt over åtte millionar bistandskroner på konsulenttenester til støtte for privatisering i fattige land.

Innsatsen for offentleg privat samarbeid (OPS) innan sektorar som vatn, transport og elektrisitet blir organisert gjennom Public-Private Infrastructure Advisory Facility (PPIAF) i Washington. Dette organet, som har kontor hos Verdsbanken, har sendt private konsulentselskap ut for å bidra til privatisering av vatnet i Zambia, jernbanen i Zwaziland og kollektivtransporten i Etiopia.

På få år har PPIAF finansiert utkast til 25 sett med lover og reguleringar for infrastruktur i fattige land. Dette inkluderer privatisering av jernbanen i Kenya, ny elektrisitetslov i Algerie, lov om naturgassen i Nigeria og lov om vassektoren på Filippinane.

Ved utgangen av 2003 hadde PPIAF ved 30 høve bidrege direkte til overføring av offentleg eigedom til privat drift. Dette inkluderer driftskontraktar for vassforsyning og kloakk, lisensar for telenett, privatisering av jernbane, privatisering av kraftverk og langvarige kontraktar for vegar og hamneanlegg.

PPIAF var oppretta i 1999. Organet inngår i den britiske regjeringa sin globale eksportoffensiv for OPS. Aktiviteten blir finansiert over europeiske bistandsbudsjett, inkludert det norske. Noreg sit også i styringsrådet for PPIAF.

Konsensus

Det er dei private konsulentselskapa som får oppdraga: «PPIAF baserer seg i stor utstrekning på at eksterne konsulentar står for aktiviteten», opplyser nettsida til organisasjonen. Av 81 millionar kroner som gjekk til ekstern aktivitet i fjor, stakk konsulentane av med 67 millionar.

Ofte står «konsensusbygging» i sentrum. Verdsbanken opplyser:

«Tiltak for konsensusbygging er ein fundamental komponent i mange av PPIAFs prosjekt, slik at forbrukarar, ikkje-statlege organisasjonar, arbeidarorganisasjonar, investorar, lokale entreprenørar og representantar for offentleg sektor alle forstår og er samde om den riktige vegen til betring av kvaliteten på infrastruktruen i landet».

Og den riktige vegen er veldig ofte, når PPIAF er i sving, privatisering gjennom OPS. Dette er den same vegen som dei fire store konsulentselskapa, KPMG, Ernst Young, Deloitte og PricewaterhousCoopers promoverer verda over. Ikkje overraskande har ein av sjefane for den daglege drifta av PPIAF, Jordan Schwartz, sin bakrunn frå konsulentselskapet Deloitte, der han fram til 1998 var «Senior Manager» i avdelinga for infrastruktur og anlegg innan «emerging markets».

Mot privatisering

Kirkens Nødhjelp markerer seg sterkt mot privatisering av vatn som strategi for utvikling i fattige land.

- Erfaringane viser at privatisering av vatn fører til at tilgangen for dei fattige blir enno verre. Spesielt gjeld dette når multinasjonale selskap blir involvert, seier Gunstein Instefjord, avdelingssjef for menneskerettar og strategisk utvikling i Kirkens Nødhjelp. Han viser til at millionar av menneske har fått dårlegare tilgang til vatn i land som Ghana, Sør-Afrika, Filippinane, Bolivia og Uganda.

- Privatisering har ikkje ført til betre infrastruktur. Vi ser heller ikkje den auka effektiviteten som vart lova. Prisane går opp, profitten går til utlandet og fleire blir utestengde frå grunnleggjande tenester, kommenterer Instefjord.

Verdsbanken pådrivar

Verdsbanken var ein pådrivar for privatisering i alle dei nemnte tilfella av privatisering i sør, noko Kirkens Nødhjelp er svært negativt innstilt til. Instefjord er når Klassekampen ringjer, ikkje kjent med PPIAFs aktive rolle på det same feltet.

- Men høyrest dette ut som god bruk av norske bistandspengar?

- Det er absolutt noko ein bør sjå nærare på, svarer Instefjord, som ikkje vil ha bastante meiningar før han har sett nærare på saka.

Den totale summen betalt frå Noreg til PPIAF ved utgangen av 2003 var 8,4 millionar kroner. Vi er eitt av mange gjevarland, men i og med at Storbritannia og Verdsbanken står for to tredelar av finansieringa, er det truleg prestisjen til bistandsmidla som er det viktigaste norske bidraget.

Hos Norad får vi opplyst at styringa med engasjementet i PPIAF no ligg hos Utanriksdepartementet. UD klarte ikkje å svara på spørsmål om PPIAF i går.

Norad har brukt over åtte millionar bistandskroner på konsulenttenester til støtte for privatisering i fattige land.

Innsatsen for offentleg privat samarbeid (OPS) innan sektorar som vatn, transport og elektrisitet blir organisert gjennom Public-Private Infrastructure Advisory Facility (PPIAF) i Washington. Dette organet, som har kontor hos Verdsbanken, har sendt private konsulentselskap ut for å bidra til privatisering av vatnet i Zambia, jernbanen i Zwaziland og kollektivtransporten i Etiopia.

På få år har PPIAF finansiert utkast til 25 sett med lover og reguleringar for infrastruktur i fattige land. Dette inkluderer privatisering av jernbanen i Kenya, ny elektrisitetslov i Algerie, lov om naturgassen i Nigeria og lov om vassektoren på Filippinane.

Ved utgangen av 2003 hadde PPIAF ved 30 høve bidrege direkte til overføring av offentleg eigedom til privat drift. Dette inkluderer driftskontraktar for vassforsyning og kloakk, lisensar for telenett, privatisering av jernbane, privatisering av kraftverk og langvarige kontraktar for vegar og hamneanlegg.

PPIAF var oppretta i 1999. Organet inngår i den britiske regjeringa sin globale eksportoffensiv for OPS. Aktiviteten blir finansiert over europeiske bistandsbudsjett, inkludert det norske. Noreg sit også i styringsrådet for PPIAF.

Konsensus
Det er dei private konsulentselskapa som får oppdraga: «PPIAF baserer seg i stor utstrekning på at eksterne konsulentar står for aktiviteten», opplyser nettsida til organisasjonen. Av 81 millionar kroner som gjekk til ekstern aktivitet i fjor, stakk konsulentane av med 67 millionar.

Ofte står «konsensusbygging» i sentrum. Verdsbanken opplyser:

«Tiltak for konsensusbygging er ein fundamental komponent i mange av PPIAFs prosjekt, slik at forbrukarar, ikkje-statlege organisasjonar, arbeidarorganisasjonar, investorar, lokale entreprenørar og representantar for offentleg sektor alle forstår og er samde om den riktige vegen til betring av kvaliteten på infrastruktruen i landet».

Og den riktige vegen er veldig ofte, når PPIAF er i sving, privatisering gjennom OPS. Dette er den same vegen som dei fire store konsulentselskapa, KPMG, Ernst Young, Deloitte og PricewaterhousCoopers promoverer verda over. Ikkje overraskande har ein av sjefane for den daglege drifta av PPIAF, Jordan Schwartz, sin bakrunn frå konsulentselskapet Deloitte, der han fram til 1998 var «Senior Manager» i avdelinga for infrastruktur og anlegg innan «emerging markets».

Mot privatisering
Kirkens Nødhjelp markerer seg sterkt mot privatisering av vatn som strategi for utvikling i fattige land.

- Erfaringane viser at privatisering av vatn fører til at tilgangen for dei fattige blir enno verre. Spesielt gjeld dette når multinasjonale selskap blir involvert, seier Gunstein Instefjord, avdelingssjef for menneskerettar og strategisk utvikling i Kirkens Nødhjelp. Han viser til at millionar av menneske har fått dårlegare tilgang til vatn i land som Ghana, Sør-Afrika, Filippinane, Bolivia og Uganda.

- Privatisering har ikkje ført til betre infrastruktur. Vi ser heller ikkje den auka effektiviteten som vart lova. Prisane går opp, profitten går til utlandet og fleire blir utestengde frå grunnleggjande tenester, kommenterer Instefjord.

Verdsbanken pådrivar
Verdsbanken var ein pådrivar for privatisering i alle dei nemnte tilfella av privatisering i sør, noko Kirkens Nødhjelp er svært negativt innstilt til. Instefjord er når Klassekampen ringjer, ikkje kjent med PPIAFs aktive rolle på det same feltet.

- Men høyrest dette ut som god bruk av norske bistandspengar?

- Det er absolutt noko ein bør sjå nærare på, svarer Instefjord, som ikkje vil ha bastante meiningar før han har sett nærare på saka.

Den totale summen betalt frå Noreg til PPIAF ved utgangen av 2003 var 8,4 millionar kroner. Vi er eitt av mange gjevarland, men i og med at Storbritannia og Verdsbanken står for to tredelar av finansieringa, er det truleg prestisjen til bistandsmidla som er det viktigaste norske bidraget.

Hos Norad får vi opplyst at styringa med engasjementet i PPIAF no ligg hos Utanriksdepartementet. UD klarte ikkje å svara på spørsmål om PPIAF i går.